محسن امراجع لعبيدي في قصيدة (( ولا انخادع والي ))))

يقول محسن امراجع لعبيدي

ولا انخادع والــــي ــ وحق من نشاني ماالعدم ياغالــــي

لا انخون عهد ولا انخادع والـــــــــــي

ياالحنون ــ ويااللي كنينك ماالغلاء مسحون

اظروف الزمان وحالتي بلهون ــ ولطت اقسامي والجيوب خوالي

مانيش مااللي عالصلاه ساهون ــ نين نخدعك يابو اقرون مدالي

ولا نمتنع عاالخير والماعون ــ لاجل امجرب عازتي في حالي

ولا لي دين ولا علي اديون ــ ونخدم وناكل من اقروش حلالي

وحاسب احسابي كي انجي مدفون ــ يوماً انجي مغسول من غسّالي

جثه الروح امفارقه واشون ــ في قبر لا مونس امفيت اعمالي

حنون قلب ما نرضا ابكاء قزون ــ ولا فاالغضب يظهر ايبان اهبالي

في بطن حوت وكي دعاء ذا النون ــ ايسبح ابحمدك في ظلام ليالي

لما هرب في مركباً مشحون ــ ابدون اذن منك يا عظيم وعالي

رزقته ابرحمه واجر مو ممنون ــ ارزقني ابرحمه يارحيم ابحالي

امواري كواين داس فاالمكنون ــ وصابر على اللي ماالزمان جرالي

وناظر مجازر من ضناء صهيون ــ وكم أم تبكي عن رضيع اتشالي

يامن نصر موسى علي فرعون ــ طلبتك اتجاوب ياكريم اسوالي

تبليهم إبقل اثمار والطاعون ــ ويبقوا هتايا من اقلال الوالي

مشيـــــــتبك بعيد انرد عاالمضمون ــ مضمون الكلام امغربله غربالي

يابو خجل ما درت دونك دون ــ ومعاك القسامي عاكسن فاالتالي

وحتى السلاح اوقات فيه ايخون ــ فيد صاحبه بو صيت كي لهلالي

ونا خاني فيك الدهر والكون ــ إعياره ضربني ضرب في مقتالي

غدربي الوقت وما علي اتهون ــ إعذرني ابظرفي ياعيون الفالي

ولا انخادع والـــــــــــــــــــــــــــــــي

ولا انخون اوعودي ــ ونلزم امعا الازم امعاي احدودي

عزيز نفس من مالي ومن ميجودي ــ نكرم ابهن فاالضيف كي يلفالي

ولد جود بوي وعوّدوه اجدودي ــ وعوّدني عليها بوي نا واعيالي

انعيش عاالعصر وانطيع في معبودي ــ ونعمد طريق الخير هي معدالي

ولا لغير ربي ما ايكون اسجودي ــ متواضع وماني من هفك متعالي

فاقد عرب من ظمنهم مريودي ــ وانروق في خلاء ماالدوج يستحلالي

احياناً وكي تسمع دليف ارعودي ــ اعرفها إنقذرلك علي موالي

ولا انخادع والـــــــــــــــــــــــــــــــــــي

وحق من نشاني ماالعدم ياغالـــــــــــــــــــــــي

لا انخون عهد ولا انخادع والـــــــــــــــي

للشاعر ــ محسن امراجع لعبيدي ــــــ البيضاء

شكرااا على هذه القصيده الرائعة وياريت الأوصاف هذينا يقعدن عند الشباب لما يقولو للبنات اوصافهم بدون خداع ولا لعب . شكرا

مشكور القوس على المشاركه الرائعه